HƏR ŞEY BİR AZ QARATƏHƏR OLMALI...
Şəfa VƏLİYEVA

  Sayı: 115 -

Tweetle

Açılan sabahlar saxlamalı özündə qoynundan çıxdığı gecənin ətrini... Bir şair nə qədər öysə də vüsalın doyulmaz ətrini ümidsizliklər sevinməli sözündə...

Hər şey bir az qaratəhər olmalı... Üzümüzdən süzülən qara göz yaşları bəyazları sevməyimizin sığortası olmalı... Qara-qara düşüncələr mavi-qızılı əməllərin gərəkliyini anlatmalı...

Qaratəhərə bürünməli ağ qızılgüllər... Tikanlarını sevməyi öyrətməli bizə qaratəhər üzüylə...Pərdələr bir az kirlənməli, pəncərələr qırılmalı, fincanlar çat verməlidir əlimizdə. Ovxalanıb tökülməli peçenyelər sevimli xalçamızın üstünə, qalmalı ayağımızın altında, qulağımızı oxşamalı xəfif xırçıltı səsləri... Qorxmamalı, gülümsəməliyik.

Hər şey bir az qaratəhər olmalı... Sevdiklərimizin arxasınca qaçmağa, sarılmağa bir qaranlıq lazım bizə... “Ağ gün”lərə birlikdə çıxmaq üçün!  “Kimsə görməsin”lər, “kimsə duymasın”lar çıxmalı leksikonumuzdan... Bütün qələmlər qara yazmalı, bütün günlüklü papaqlar qara saçlara yaraşmalı... Gözlər ağlamaqçün darıxmamalı, qara haşiyəli cib dəsmalları bəyaz kağız dəsmallara məğlub olmamalıdır.

Qaratəhər olmalı hər şey bir az... Sədaqətin qucağında şirin laylayla daim yuxulamalı xəyanət...O qədər şirin yatmalı ki, böyüməyi düşünməyə macalı olmamalı... Almalar yetişmədən dərilməli, boşqabın bir küncündə daim bir çimdik duz olmalı, kal almaları yemək üçün. Bıçaqlardan küsməli almalar, dişlək yeri üçün darıxmamalı... O qaralan diş yerində bir qara qarışqa varlığının anlamını tapmalı...

Hər şey bir az qaratəhər olmalı... Bu yazının sonuna qoyduğum nöqtə boyda bir ləkə tapmalıyam ağ köynəyimin yaxasında... Və o ləkəni sevməyi öyrənməliyəm... Ürəyimdə sevgim üçün ayırdığım çəmənliyin lap ortasında bir qara qızılgül becərməliyəm, bağışlaya bilmədiklərimə hədiyyə etməkçün...

Fincanımızda bir qaraçay yarpağı tapmalıyıq, barmağımızda bir ağac cızığının izini... Qapımızın açar yerini qara rəngdə boyamalı, palçıqlı ayaq izlərinə baxıb düşüncələrə dalmağı bacarmalıyıq... O zaman bəyazlar üçün ölməyə hazır olacağıq ki, hər şey bir az qaratəhər olmalı!